Caspian News, 12 маусым. Қазақстанда мемлекеттік қызметке орналасу және іріктеуден өту тәртібі айтарлықтай жеңілдеді. Енді үміткерлер арнайы конкурстық тестілеуді eqyzmet.gov.kz бірыңғай порталы арқылы толықтай онлайн форматта тапсыра алады. Бұл реформа үміткерлердің уақыты мен қаржысын тиімді пайдалануға септігін тигізбек.
Жаңа жүйе бойынша мемлекеттік қызметке қатысу үшін үміткерлер алдымен заңнаманы білуге арналған тестілеуден және жеке қасиеттерін бағалау кезеңінен өтеді. Қазіргі таңда жеке қасиеттерді бағалау жүйесі қатысушының таңдаған лауазымдық деңгейіне қарай үш арнайы бағдарламаға бөлінген. Айта кетерлігі, сәтті тапсырылған тестілеу нәтижесінің жарамдылық мерзімі — тура бір жылды құрайды.
Эссе мен практикалық тапсырмалар: Жаңа талаптар қандай?
Іріктеу процесіндегі тағы бір маңызды өзгepic — бос лауазымдардың санатына қарай қойылатын талаптардың әртараптандырылуы:
-
✍️ Басшылық лауазымдарға үміткерлер: Өздерінің стратегиялық ойлау қабілетін дәлелдеу үшін арнайы тақырыпта эссе жазып, комиссия мүшелерімен бейнебайланыс (онлайн) арқылы тікелей әңгімелесуден өтеді.
-
🛠️ Өзге (атқарушы) лауазымдарға кандидаттар: Теориялық біліммен қатар, нақты мамандыққа байланысты бекітілген практикалық тапсырмаларды орындайды.
Департамент мамандарының мәлімдеуінше, осындай оңтайландырулар мен бюрократиялық кедергілерді жоюдың арқасында өңірде мемлекеттік қызметке қызығушылық танытып, құжат тапсырушылар саны айтарлықтай артып отыр.
Жер шарының кез келген нүктесінен қатысуға болады
ҚР Мемлекеттік қызмет істері агенттігінің Атырау облысы бойынша департаментінің басшысы Нұрлан Еркебаев жаңа жүйенің артықшылықтары мен тиімділігіне тоқталды:
«Осыған дейін мемлекеттік қызметке қабылдауды жеңілдету үшін жалпы пробациялық түрде, яғни пилоттық режимде бірнеше жыл бұрын цифрлық іріктеуді тәжірибеден өткізіп келген болатынбыз. Ал үстіміздегі жылдан бастап бұл цифрлық іріктеу жүйесін толыққанды іске асыруға ресми түрде көштік.
Бұл реформа бізге не берді? Біріншіден, мемлекеттік қызметтің қолжетімділігін барынша қамтамасыз етті. Себебі кез келген азамат жер шарының кез келген нүктесінен, интернет бар жерден конкурсқа еш қиындықсыз қатыса алады. Өз уақыттарын үнемдейді, ең бастысы — құжаттарды ешқандай мекемеге апарудың, қағаз жүзінде өткізудің ешқандай қажеттілігі жоқ».
Жүйе қашан енгізілді?
Мемлекеттік қызметке қабылдаудың бұл жаңартылған, автоматтандырылған тәртібі биыл 1 сәуірден бастап ресми түрде заңды күшіне енді. Жаңа электронды жүйе іріктеу процесін толыққанды цифрландырып, сыбайлас жемқорлық тәуекелдерін жоюға және конкурс рәсімдерінің ашықтығы мен әділдігін арттыруға бағытталған.
Анықтама ретінде айта кетсек, бүгінгі таңда Атырау облысы бойынша түрлі салада 3 мыңға жуық мемлекеттік қызметші ел игілігі үшін абыройлы қызмет атқарып келеді.