Caspian News, 30 шілде. Маңғыстау облысы Бейнеу ауданындағы Есет, Төлеп, Тұрыш және Тәжен ауылдары ішімдік сатудан және тұтынудан түбегейлі бас тартып, «Алкогольсіз ауылдар» қатарына қосылды.
Бейнеу ауданы прокуратурасының бастамасымен іске асырылған «Айқын нәтиже» жобасын аталған төрт елді мекендегі 2,6 мыңнан астам тұрғын мен жергілікті кәсіпкерлер бірауыздан қолдаған. Жергілікті дүкен иелері алкоголь өнімдерін сөрелерден өз еріктерімен алып тастап, салауатты өмір салтын насихаттауға шешім қабылдады.
Құқық қорғау органдары мен жергілікті билік бұл қадамның отбасылық-тұрмыстық зорлық-зомбылықты, бұзақылықты және мас күйде жасалатын қылмыстарды азайтуға тікелей ықпал ететінін атап өтті. Ауыларалық жиындар мен той-томалақтарда ішімдіктің орнын қымыз бен шұбат басып келеді. Айта кету керек, өңірде бұған дейін Онды, Болашақ және Бекі сияқты бірнеше ауыл бұл бастаманы сәтті енгізген болатын. Тәжірибе көрсеткендей, арақ-шараптан бас тартқан мұндай елді мекендерде қылмыс деңгейі нөлге жуықтап, қоғамдық тәртіп айтарлықтай жақсарады.