Caspian News, 31 шілде. Елімізде Еңбек кодексіне жұмыскерлердің құқықтарын қорғауды күшейтетін маңызды өзгерістер мен толықтырулар енгізілді. Жаңа нормаларға сәйкес, өзге әріптесінің міндетін уақытша атқарған қызметкерге міндетті түрде қосымша ақы төленуі тиіс, сондай-ақ жұмыс орнында ар-намыс пен қадір-қасиетті қорғау құқығы заң жүзінде шегеленді. Бұл туралы Атырау облыстық Еңбек инспекциясы департаменті өкілдері мәлім етті.
💰 Қосымша жүктеме – қосымша төлем
Еңбек кодексінің 111-бабына енгізілген толықтыруларға сәйкес, енді еңбек демалысына шыққан немесе сырқаттануына байланысты уақытша еңбекке жарамсыз болған қызметкердің міндетін атқарған жұмыскерге тиісті үстеме ақы төленуі міндетті.
Атырау облыстық Еңбек инспекциясы департаменті басшысының орынбасары Кемел Иманғалиев: «Бір қызметкер еңбек демалысына кеткен немесе еңбекке жарамсыздық парағына шыққан жағдайда, оның қызметтік міндеттері басқа қызметкерге жүктелсе, оған тиісті қосымша төлемдер жүргізілуі тиіс. Еңбек кодексінің 111-бабына осылайша қосымша міндеттер мен жүктемелер үшін ақы төлеу туралы нақты өзгеріс енгізілді».
Үстеме ақының нақты мөлшерін жұмыс беруші мен жұмыскер өзара келісе отырып белгілейді.
🛡️ Ар-намыс пен қадір-қасиеттің қорғалуы
Кодекстің 22-бабы жұмыскердің еңбек қызметі барысында ар-намысы мен қадір-қасиетін қорғау құқығымен толықтырылды. Бұл арқылы әрбір қызметкер:
-
Кемсітушілікке (дискриминация);
-
Психологиялық қысымға (моббинг/буллинг);
-
Адамның қадір-қасиетін қорлайтын кез келген әрекеттерге жол берілмейтін қауіпсіз әрі жайлы еңбек жағдайында жұмыс істеуге құқылы.
📱 Электронды шарттар және заң бұзушылықтарды анықтау
Бүгінгі таңда Атырау өңіріндегі 8 526 кәсіпорында қызметкерлермен 171 978 электрондық еңбек шарты жасалған. Аймақтағы электронды құжат айналымы 96 пайызды құрайды.
Дегенмен, жыл басынан бері электрондық еңбек шартын уақытылы тіркемеген 4 заң бұзушылық дерегі анықталып, жауапты тұлғалар әкімшілік жауапкершілікке тартылды.
📋 Еңбек құқығы бұзылса не істеу керек?
Еңбек инспекциясы мамандарының айтуынша, құқығы бұзылған азаматтар мына тәсілдермен шағымдана алады:
-
Тікелей өтініш: Еңбек инспекциясы департаментіне барып арыз жазу;
-
Онлайн портал: eOtinish электрондық порталы арқылы шағым түсіру.
Маңызды: Өтінішке еңбек қатынастарының болғанын растайтын құжаттарды (еңбек шарты, бұйрық, аударымдар т.б.) қоса тіркеу қажет. Арыздар заңнамаға сәйкес 15 жұмыс күні ішінде қаралады.