Caspian News, 28 мамыр. Махамбет ауданында азаматтық қоғамның маңызды институты саналатын бітімгершілік саласын дамыту бағытында «Жастар арасындағы құқықтық мәдениет, медиация және қоғамдық келісім» тақырыбында ауқымды кездесулер сериясы өтті. Облыстық «Қоғамдық келісім» мекемесінің Медиация орталығы ұйымдастырған бұл шара «Елдесу мен татуласу» жобасы аясында жүзеге асырылды.
Іс-шара желісі алдымен Сарайшық ауылындағы Көпбейінді ауыл шаруашылығы колледжінде бастау алып, кейін аудандық Отбасын қолдау орталығында жалғасты. Жиынға жастар, ауыл ақсақалдары мен ардагерлері, сондай-ақ қоғамдық медиаторларды қосқанда 100-ге жуық адам қатысты.
Мектеп медиациясы және негізгі мақсат
Басқосуда медиативтік тәсілдердің тиімділігі түсіндіріліп, бұл бағыттың жасөспірімдер арасындағы құқықбұзушылықтың, суицидтік мінез-құлықтың және түрлі әлеуметтік қауіптердің алдын алудағы маңызы жоғары екені айтылды.
Хаят Джапаров, «Дүнгендердің республикалық ЭМО» РҚБ Атырау облыстық филиалының төрағасы:
«Бұл бағытта әлі де жасалатын жұмыстар өте көп. Біздің пайымдауымызша, әрбір мектепте, жоғары оқу орындарында, колледждер мен барлық білім беру ұйымдарында «мектеп медиациясы» жүйесі енгізілуі керек. Ең алдымен, мұғалімдерді, мектеп басшылары мен оқу ісінің меңгерушілерін медиация негіздеріне баулып, оқыту қажет. Себебі баламен жұмыс істеуде бұл өте нәтижелі әдіс.
Біздің басты мақсатымыз да — осы оқыту процесін жүйелі ету. Күні бүгін облыс бойынша 32 медиатор белсенді жұмыс істеп жатыр, алдағы уақытта қатарымыз одан әрі толығады деп сенемін».
Өтінімдер статистикасы мен халықтың сауаттылығы
Семинар-тренинг барысында Махамбет ауданындағы дауларды шешу көрсеткіштері мен оң динамикасы сөз болды.
Жібек Мұғауова, Есбол ауылының кәсіби және қоғамдық медиаторы:
«Өткен жылдың қорытындысы бойынша бізге жалпы алғанда 60-тан астам өтінім келіп түскен болатын, оның 40-тан астамы оң шешімін тапты. Ал ағымдағы жылы 20-дан астам өтінім тіркеліп, олардың барлығы да өзара келісіммен, сәтті шешілді. Бұл мәселелердің негізгі бөлігі — отбасылық жанжалдар, сондай-ақ 1 дерек мектеп оқушыларының көше тәртібін бұзуына қатысты болды.
Қазіргі уақытта халық медиация қызметін қолдануды өте сауатты қабылдайды. Кез келген дау-дамайдың сотқа жетпей, өзара келісіммен, адамгершілікпен шешілгені қоғам үшін де, мемлекет үшін де өте пайдалы».
Махамбет ауданындағы медиацияның әлеуеті
Жиын барысында облыстық Білім беру басқармасымен жасалған өзара ынтымақтастық меморандумы аясында атқарылған жұмыстар сараланып, аудандық қоғамдық медиаторлар кеңесінің жаңа төрағасы сайланды.
| Көрсеткіштер мен бағыттар | Ағымдағы жағдай мен нәтиже |
| Махамбет ауданындағы медиаторлар саны | Бүгінгі таңда ауданда 11 қоғамдық медиатор қызмет етеді. |
| Қаралатын даулардың сипаты | Азаматтық, еңбек, отбасылық және құқықтық даулар, сондай-ақ ауырлығы жеңіл және орташа қылмыстық істер. |
| Жұмыс тәсілі | Дауларды сот процесіне жеткізбей, психологиялық әдістер мен кәсіби келіссөздер арқылы бейбіт жолмен шешу. |
| Ұлтаралық татулық | Ауданда 19 түрлі ұлт өкілі тату-тәтті ғұмыр кешіп жатыр, этносаралық ахуал тұрақты. |
Семинар-тренинг соңында кәсіби шеберлігін арттырып, келіссөз жүргізудің психологиялық дағдыларын меңгерген аудандық қоғамдық медиаторларға арнайы біліктілік сертификаттары салтанатты түрде табыс етілді.