Caspian News, 10 тамыз. Атырау облысының Құрманғазы ауданында өтетін дәстүрлі «LOTOS FEST» фестивалін ұйымдастыруға аудандық бюджеттен 191,9 миллион теңге қаржы бөлінді.
Бөлінген қаржының 131,9 миллион теңгесі туристік инфрақұрылымды дамытуға, ал 60 миллион теңгесі ауқымды мәдени-көпшілік бағдарламаға бағытталған.
Биыл фестиваль 15–16 тамыз күндері екі күн бойы аталып өтеді. Өткен жылы лотос алқаптарын 40 мыңнан астам адам тамашаласа, биыл келушілер легі бұдан да көп болады деп күтілуде.
🏗️ Инфрақұрылымдық жаңашылдықтар
Аудан әкімдігінің хабарлауынша, бұл қаржы бір реттік шараға емес, келесі туристік маусымдарда да ұзақ мерзімді пайдаланылатын нысандарды қалыптастыруға жұмсалады. Фестиваль аяқталғаннан кейін барлық нысандар ауылдық округтің балансында қалады.
-
Жаңа понтон соқпағы: Былтырғы 120 метрлік соқпақ туристер ағынына жеткіліксіз болғандықтан, биыл ұзындығы 414 метр, ені 2 метр болатын жаңа понтон конструкциялары орнатылады.
-
Бақылау алаңдары: Соқпақ бойында көлемі 6х4 метр болатын 9 арнайы бақылау алаңы жасалады.
-
Айлақ пен жарықтандыру: Қайықтар санының артуына байланысты айлақ кеңейтіліп, аумақ толық жарықтандырылады және генераторлар қойылады.
-
Қауіпсіздік мен жағдай: Полиция, төтенше жағдайлар қызметі, дәрігерлерге арналған модульдік орындар мен заманауи санитарлық модульдер қарастырылған.
🛍️ 🎤 Кәсіпкерлік пен мәдени бағдарлама
Фестиваль жергілікті шағын және орта бизнеске зор мүмкіндік береді:
-
Сауда және тамақтану: Аумақта 50 сауда павильоны мен 30 тамақтану орны қызмет көрсетеді.
-
Концерттік бағдарлама: Фестиваль өтетін күндері отандық эстраданың танымал әншілері өнер көрсетеді деп жоспарлануда.