Caspian News, 6 қараша. Абу-Дабиде өткен кездесуде «ҚазМұнайГаз» Ұлттық компаниясының басқарма төрағасы Асхат Хасенов пен «ExxonMobil» компаниясының аға вице-президенті Питер Ларден Солтүстік Каспий жобасының жүзеге асырылу барысын талқылады.
Кездесу барысында тараптар Кашаган кен орнындағы өндірістік көрсеткіштерге, жобаны уақтылы әрі тиімді іске асыруға, сондай-ақ қазақстандық қамтуды арттыруға ерекше назар аударды.
🔹 2025 жылдың алғашқы тоғыз айының қорытындысы бойынша Кашаган кен орнында 13,6 миллион тонна мұнай өндірілді. Бұл жоспарланған 13,4 млн тоннадан жоғары көрсеткіш.
🔹 Жыл қорытындысымен 18,25 миллион тонна мұнай өндіру көзделіп отыр.
Асхат Хасенов атап өткендей, Кашаган – Қазақстан мұнай-газ саласының стратегиялық жобаларының бірі, және оның тұрақты әрі қауіпсіз дамуы ел экономикасының өсуіне тікелей әсер етеді.
Кездесуде сондай-ақ Каспий теңізінің тайыздануы, теңіздегі операциялардың қауіпсіздігі, экологиялық тепе-теңдікті сақтау және экожүйені қорғау мәселелері де талқыланды.
Тараптар энергетикалық саладағы ынтымақтастықты одан әрі тереңдетуге және Каспий аймағындағы бірлескен жобаларды табысты жүзеге асыруға дайын екенін растады.