Облыстағы мешіттер де сақтық шараларын одан әрі күшейтуге кірісті.
Бұған дейін парызын Алла үйінде өтеуді жөн көретін жамағатқа дәретін үйден алып келіп, намаздан кейін кідірмеу, бір-бірімен қол алыспау талап етілсе, енді жұма күнгі намазда оқылатын уағыздар, құран бағыштау, тәспих санау секілді амалдар алынып тасталды. Сондай-ақ, өмірден өткен мұсылманды ақтық сапарға жөнелтуден өзге, діни ұстанымға қатысты жиындар тек қана облыстың бас имамының рұқсаты бойынша жүзеге асырылады. Бұл талап облыс аумағындағы 31 мешітке таратылған.