Caspian News, 19 мамыр. Мұнайлы шаһар Атырауда Халықаралық отбасы күні кең көлемде аталып өтті. Мереке аясында ұйымдастырылған ең тағылымды әрі маңызды шаралардың бірі — «Әйел POWER: отбасыға тірек, қоғамға серпін» атты креативті фасилитациялық кездесу болды.
Атырау облысы әкімдігі жанындағы Әйелдер істері және отбасылық-демографиялық саясат жөніндегі комиссияның бастамасымен және «Жарқын ЖанҰя» қоғамдық бірлестігінің ұйымдастыруымен өткен бұл басқосуға көпбалалы және жалғызбасты аналар, ерекше күтімді қажет ететін балаларды тәрбиелеп отырған әйелдер, сондай-ақ өмірлік қиын жағдайға тап болған азаматтар қатысты.
Мотивация беру және отбасылық құндылықтарды дәріптеу
Кездесу барысында түрлі сала мамандары мен психологтар сөз сөйлеп, қатысушыларға арналған арнайы тәжірибелік жаттығулар, интерактивті ойындар мен ашық пікір алмасу алаңдарын жүргізді. Шара барысында әйелдер өміріндегі маңызды кезеңдер талқыланып, қатысушылар өткен өмірлік тәжірибелерін саралады және болашаққа деген жоспарларымен бөлісті.
Динара Құдайбергенова, «Жарқын ЖанҰя» ҚБ төрайымы:
«Бұл шара бірінші кезекте отбасылық құндылықтарды дәріптеуге және өмірлік қиын жағдайға тап болған әйелдердің отбасындағы рөлін, қоғамдағы орнын айқындауға бағытталған. Біздің мақсатымыз — нәзік жандыларға шабыт сыйлап, ішкі мотивация беру. Фасилитация барысында түрлі психологиялық ойындар ойнатылып, қатысушылар өздерінің өзекті пікірлерін ортаға салып, еркін пікірталас жүргізуде».
«Болашаққа жол ашқандай күшті әсер алдым»
Креативті тренинг форматында өткен кездесу қатысушылардың көңілінен шығып, оларға үлкен эмоционалдық серпіліс сыйлады.
Алтынгүл Каженова, шараға қатысушы ана:
«Бүгінгі тренингтен өте күшті әсер алып жатырмын. Күнделікті күйбең тіршілікпен ұмытыла бастаған бұрынғы армандарымыз бен мақсаттарымызды еске түсіріп, болашаққа жол ашқандай болды. Кездесу барысында түрлі эмоцияларға беріліп, ішкі дүниемізді ақтардық. Жоғары деңгейдегі тренингті ұйып тыңдап, керемет әсерде отырмын. Осындай қолдау шарасына келгеніме өте қуаныштымын».
Ұйымдастырушылардың мәлімдеуінше, мұндай креативті кездесулер өмірлік сындарлы кезеңді бастан өткеріп жатқан әйелдердің өз-өзіне деген сенімін арттыруға, депрессиядан арылуға және оларға қоғам тарапынан үлкен эмоционалдық қолдау көрсетуге мүмкіндік береді. Осы тектес қолдау жобалары аймақта алдағы уақытта да жүйелі түрде ұйымдастырылмақ.