Caspian News, 25 тамыз. Атырауда көптен бері шешімін таппай келе жатқан «Ерік-Мостовой» каналын қайта жаңғырту жобасының шекті құны 31 миллиард 669 миллион теңге деп белгіленді. Алайда қалалық әкімдік өкілдері бұл сома жобаның нақты немесе сметалық құны емес екенін хабарлады.
Ерік-Мостовой арнасының құрылысы 2000 жылдардың басында басталғанымен, жоба аяқсыз қалған болатын. Жаңадан тағайындалған қала әкімі мәселені арнайы барып көріп қайтқанымен, құрылыс жұмыстары биыл да басталмайтын сыңайлы.
🏗️ Жобада не қарастырылған?
16 шақырымды құрайтын ашық канал жүйесін толықтай жабық жүйеге ауыстыру жоспарланып отыр. Аумақта мынадай ауқымды жұмыстар жүргізіледі:
-
Инженерлік инфрақұрылым: Өздігінен ағатын, қысымды және нөсерлі кәріз желілерін жүргізу, сондай-ақ кәріз сорғы станциясын салу.
-
Абаттандыру мен демалыс аймағы: Ұзындығы 16 шақырым болатын велосипед және жүгіру жолақтарын төсеу, жарықтандыру орнату, көгалдандыру және тас төсеніштер төсеу.
-
Жер телімдері: Жобаны жүзеге асыру барысында жекеменшік жер учаскелері мен нысандарды мемлекет қажеттілігіне алу талап етілмейді.
📅 Құрылыс қашан басталады?
Әкімдіктің хабарлауынша, жобаны жүзеге асыру 2026–2028 жылдарға жоспарланғанымен, нақты құрылыстың қашан басталатыны әзірге белгісіз. Қазынадан әлі қаржы бөлінген жоқ, қазіргі уақытта тек конкурс жариялауға қажетті құжаттар рәсімделуде.
Атырау қаласының әкімдігі:
«Жобалау жұмысын бастап, оны ағымдағы жылдың соңына дейін аяқтау жоспарлануда. 2027 жылы жобаны мемлекеттік сараптамаға енгізу көзделген. Мемлекеттік сараптаманың оң қорытындысы алынғаннан кейін ғана жобаның нақты құны айқындалатынын хабарлаймыз».