Caspian News, 15 мамыр. Атырауда «Заң мен тәртіп» қағидатын нығайту мақсатында дәстүрлі түрде өтетін тегін құқықтық көмек көрсету акциясы өз жалғасын тапты. Тұрғындардың заңдық сауатын арттыруға бағытталған шара барысында жүздеген азамат көкейкесті сауалдарына жауап алды.
«E-Zaң көмегі»: Цифрлық адвокат қызметі
Акция аясында халыққа құқықтық кеңесті қашықтан алу жолдары түсіндірілді. Әсіресе, азаматтарға адвокат таңдауға және онлайн кеңес алуға мүмкіндік беретін «E-Zaң көмегі» цифрлық сервисі таныстырылды.
-
2025 жылы: Жүйені 10 мыңға жуық адам пайдаланған.
-
Биыл (2026 жылдың басынан бері): 2 мыңнан астам атыраулық осы сервистің көмегіне жүгініп үлгерді.
21 мекеме бір алаңда
Құқықтық кеңес беруге тек заңгерлер емес, түрлі саланың білікті мамандары қатысты. Атап айтқанда, Әділет департаментінің бөлім басшылары, «Отбасы банк», жер қатынастары бөлімі және өзге де құзырлы орган өкілдері тұрғындарды қабылдады.
Гүланда Қыстаубаева, Атырау облыстық Әділет департаментінің басшысы:
«Біз бұл жерде тек кеңес беріп қана қоймаймыз. Азаматтардың мәселесі түпкілікті шешілгенше бақылауда ұстаймыз. Егер сұрақ біздің құзыретімізден тыс болса, тиісті органдарға ресми хат жолдап, жауабын алған соң тұрғындармен кері байланысқа шығамыз. Әрбір өтініш нәтижелі аяқталуы тиіс».
Көмек ай сайын көрсетіледі
Ұйымдастырушылардың айтуынша, бұл акция науқандық шара емес, ол ай сайын тұрақты түрде өткізіліп тұрады. Жиынға жалпы саны 21 мемлекеттік және ведомстволық мекеме өкілдері жұмылдырылған.
Мұндай шаралар сот жүктемесін азайтуға және дауларды сотқа дейін шешу мәдениетін қалыптастыруға септігін тигізеді. Әділет департаменті барлық тұрғындарды заңдық мәселелері туындаған жағдайда осындай ашық алаңдардың мүмкіндігін пайдалануға шақырады.