Caspian News, 3 қыркүйек. Елімізде Үкіметтің жаңа құрамы ресми түрде бекітілді. Премьер-министрдің орынбасарлары мен министрлер толықтай тағайындалып, Министрлер кабинетінің негізгі лауазымдары белгілі болды.
Еске сала кетейік, 31 тамызда Құрылтайдың жалпы отырысында Мемлекет басшысы Қасым-Жомарт Тоқаев Олжас Бектеновтің кандидатурасын Үкімет басшысы қызметіне ұсынып, депутаттардың келісімінен соң ол қайтадан Премьер-министр болып тағайындалған еді.
Бұрынғы министрлердің басым бөлігі өз орнында қалғанымен, бірқатар маңызды ведомстволарға жаңа басшылар келді. Депутаттардың пікірінше, алдағы 4 ай Бектенов үкіметі үшін үлкен сынақ кезеңі болмақ.
🔄 Үкімет құрамындағы 4 жаңа министр
Негізгі экономикалық және әлеуметтік блоктардағы сабақтастық сақталғанымен, 4 министрлікте басшылар ауысты:
-
Сыртқы істер министрлігі: Елдің бас дипломаты қызметіне Мұхтар Тілеуберді келді. Ол бұған дейін Қазақстанның Аустриядағы Елшісі әрі Венадағы халықаралық ұйымдар жанындағы тұрақты өкілі болған.
-
Төтенше жағдайлар министрлігі: Шыңғыс Әріновтің орнына бұған дейін Маңғыстау облыстық ТЖД басқарған Мұрат Мұханов тағайындалды.
-
Экология және табиғи ресурстар министрлігі: Зейнет жасына жетуіне байланысты қызметтен кеткен Ерлан Нысанбаевтың орнын Әлібек Қуантыров басты.
-
Мәдениет және ақпарат министрлігі: Ведомство тізгіні Президенттің ішкі саясат және коммуникациялар жөніндегі бұрынғы көмекшісі Арман Қырықбаевқа тапсырылды.
Премьер-министрдің орынбасарлары Нұрлыбек Нәлібаев, Ғалымжан Қойшыбаев, Қанат Бозымбаев, Жаслан Мәдиев пен Серік Жұманғарин өз позицияларын сақтап қалды.
📉 Құрылтай депутаттарының талабы: Экономика мен Инвестиция
Халық қалаулыларының айтуынша, жаңадан жасақталған Үкіметтің алдында ел экономикасын шикізатқа байланған тәуелділіктен арылтып, өсімнің жаңа көздерін табу міндеті тұр.
Ерлан САИРОВ, ҚР Құрылтай депутаты:
«Қазақстан халқының әлеуметтік жағдайын жақсарту үшін шетелден инвестицияны көбірек тарту керек. Экономиканы дамытудың жаңа көздерін ашу қажет. Ол шикізатқа байланысты болмауы тиіс — бұл жаңа өндіріс, жаңа бағыт. Үкіметтің әрі қарай жұмыс істеуі осы мәселелердің шешілуіне байланысты болады. Жаңа жылға дейін бұл түйткілдер шешілмесе, нақты шешімдер қабылдануы мүмкін».
Сонымен қатар, депутаттар алдағы жылдарға арналған бюджетті бекіту және Ұлттық қордан бөлінетін қаражатты тиімді игеру жұмыстарының басты назарда болатынын атап өтті.
Наурыз САЙЛАУБАЙ, ҚР Құрылтай депутаты:
«Алдағы жылдарға арналған бюджет талқыланатын кезең жақындап қалды. Президент бұған дейін Ұлттық қордан кемінде 10 трлн теңге бөлу керек екенін айтты. Енді осы бағытта қарқынды жұмыс басталады».
Мақсұт НАСИБУЛОВ, ҚР Құрылтай депутаты:
«Жаңартылған министрлер кабинеті өз жұмысын көрсетеді деген үміттеміз. Олар депутаттардың алдына келіп, өз жоспарлары мен ұсыныстарын айтып, қойылған сұрақтарға жауап берді».