Caspian News, 7 тамыз. Атырау облыстық балалар ауруханасында алғаш рет кохлеарлық имплантация бойынша халықаралық шеберлік сағаты өтті. Бұл – есту қабілеті ауыр дәрежеде төмендеген немесе толықтай айырылған балаларға дыбысты қабылдауға, сөйлеуді үйренуге және қоғамға толық бейімделуге мүмкіндік беретін жоғары технологиялық ота.
Осыған дейін мұндай күрделі операциялар елімізде тек Астана, Алматы және Түркістан қалаларында жасалып келген болатын.
👶 Жоспар мен отаның маңыздылығы
Қазіргі таңда Атырау облысында есту қабілеті зақымданған 400-ден астам бала есепте тұр. Шеберлік сағаты аясында алғашқы оталар 2 және 3 жастағы екі бүлдіршінге сәтті жасалды.
Қайсар АБДАЛИЕВ, Атырау облыстық денсаулық сақтау басқармасының басшысы: «Біз бүгін екі балаға ота жасадық. Сонымен қатар тағы 4 баланы отаға дайындап жатырмыз. Осы жылдың соңына дейін шеберлік сағаты шеңберінде тағы 4 балаға ота жасаймыз деп жоспарлап отырмыз.
Яғни, жергілікті ЛОР-дәрігерлеріміз бұл операцияларды толық меңгергенге дейін бірнеше рет осындай мастер-кластарды өткізу жоспарымызда бар».
👨⚕️ Дәрігерлер тәжірибесі мен қолдау
Қазіргі уақытта Атырау облыстық балалар ауруханасында 2 жақ-бет хирургі, 3 ЛОР-дәрігер және 2 сурдолог қызмет етеді. Шеберлік сағаты барысында олар алматылық әріптестерінен заманауи ота жасау әдістерін үйреніп, тәжірибе алмасты.
Жоба Атырау облыстық денсаулық сақтау басқармасының, Алматыдан келген білікті сарапшылардың, демеушілердің және «Шұғыла» («Подари детям жизнь») қайырымдылық қорының қолдауымен жүзеге асты.
Мұрат ӘУЕЛБАЕВ, Алматы қалалық №5 клиникалық ауруханасының №1 ЛОР-бөлімшесінің меңгерушісі: «Бұл – өте жоғары технологиялық операция. Себебі ота ішкі құлаққа жасалады, электрод тікелей ұлуға (улитка) енгізіледі. Оның өзіндік ерекшеліктері мен арнайы техникасы бар. Сонымен қатар импланттың қай фирмадан екеніне де байланысты өз технологиялары болады.
Біздің Алматыдағы ауруханада жылына осындай 140-қа жуық ота жасалады. Ал Атырауда бұл бастаманы алғаш рет жүзеге асырып жатырмыз».
🚀 Өңір медицинасының жаңа кезеңі
Мамандардың айтуынша, бұл шара тек бір реттік шеберлік сағаты емес, аймақтағы балаларға қолжетімді жоғары технологиялық медициналық көмек көрсетудің жаңа кезеңі. Алынған білім мен тәжірибе алдағы уақытта мұндай оталарды Атырауда жергілікті дәрігерлердің күшімен тұрақты түрде жасауға мүмкіндік береді.