Батыс Қазақстан облысынан келген екі отбасы Атыраудан үйлі болды. Оларға баспана ҚР Оқу-ағарту министрлігінің арнайы жобасы бойынша берілді.
Оралдық Ержан Егімбай қазір Әбіш Кекілбаев атындағы №41 мектеп-гимназиясында математика пәнінен сабақ береді. 11 жыл еңбек өтілі бар мұғалім байқауға қатысып, іріктеуден өткеннен кейін Атырау қаласына жолдама алған. Осылайша, қала орталығынан үш бөлмелі пәтердің кілтіне ие болды.
19 жыл еңбек өтілі бар Гүлжан Борамбаева да байқаудан өткен ұстаздардың бірі. Ол да әріптесі Ержан Егімбаймен көрші тұрмақ.
Гүлжан БОРАМБАЕВА, №31 мектеп-гимназиясының мұғалімі
Осындай бағдарламаның шыққанын былтыр естідім. Содан кейін биыл тамыз айында конкурсқа қатыстым. Өте қуаныштымын. Бұл – ұстаздарды қолдау, білім саласына үлкен мән беру деп ойлаймын. Себебі, мамандар жетіспейтін осы төрт облысты атап көрсеткен болатын. Қолдауларыңызға көп-көп рахмет! Өте қуаныштымыз.
Аталған республикалық жоба 2022 жылы басталды. Бағдарлама бойынша іріктеуден өткен ұстаздар Түркістан, Атырау, Маңғыстау және Алматы облыстарына жіберіледі. Бұл өңірлерге математика, физика, химия, орыс тілі мен әдебиеті, шет тілі мұғалімдері қажет.
Білім беру басқармасы басшысының айтуынша, пәтерақысы мемлекет қаражатынан төленеді. Әзірге өзге өңірден келген 6 ұстазға жаңа пәтер кілті табысталды. Алда тағы 4 мұғалім 15 желтоқсанға дейін баспаналы болады дейді Ерлан Сламбеков.