Индерліктер Мақтарал тұрғындарына гуманитарлық көмек жинауда. Қызыл судан зардап шеккендерді қолдауда аудан халқы ерекше белсенділік танытып жатыр. Игі істі «Газель» автокөлігінің бір топ жүргізушісі ұйымдастырған. Олар арнайы ашылған есеп шотқа қаржы жинап, азық-түлік пен киім-кешек сатып алуда.
Нұрлан САГИДАНОВ, автокөлік жүргізушісі
— Индер ауданы газелистер ұжымдастары болып қолұшымызды созуға ниетімізді білдіріп осы рамазан айында сауапқа жазсын деп халықтан да көмек сұраймыз. Азық-түлікпен, кимі-кешекпен болсын каспий голд карточкамызға да ақшалай көмек болса да сұраймыз. Осы Газель көліктері Алла қаласа 8 күні таңда жолға шығады.
Көп түкірсе көл. Бар-жоғы 2 күнде аудан халқынан 400 мыңдай ақша жиналыпты. Бұл бастамаға, әсіресе, жастар тарапынан қол ұшын созғандар көп дейді ұйымдастырушылар.
Дәулетжан БАЙБАҚТЫ, белсенді
-Осы орайда кешеден бері 400 мыңға жақын ақша түсті, қолма қол түсті, соның 70 мыңына киім-кешек алынды. Қалғандарының барлығына ақшалай емес тамақтай көмектесетін боламыз. Еліміз аман жұртымыз тыныш болсын. Ешқандай апат, оқыс оқиғалар болмасын.
Қайырымдылықты қасиетті іске балайтын индерліктерден жиналған бұл көмек бірер күннен кейін мақтаралдықтардың қолына жетпек.
