Caspian News, 7 мамыр. Отан қорғаушылар күніне орай Атырау облысының Жылыой, Исатай және Мақат аудандарында салтанатты жиындар мен концерттік бағдарламалар ұйымдастырылды. Ел тыныштығы мен қауіпсіздігін күзеткен азаматтар құрметтеліп, сала үздіктері марапатталды.
Жылыой ауданы: «Ерлер – ел тірегі»
Жылыой ауданында өткен мәдени іс-шара ер азаматтардың қоғамдағы рөлін ұлықтауға арналды. Аудан әкімінің орынбасары Ерлан Нұрланов құқық қорғау саласының қызметкерлеріне ерекше алғыс білдіріп, аудандық полиция бөлімінің бірнеше маманын «Алғыс хаттармен» марапаттады.
Мерекелік кеште «Жем аруы» халықтық би ансамблі мен жергілікті өнерпаздар көрерменге жоғары көңіл-күй сыйлады. Мәдениет үйінің әдіскері Жайна Нұрханова барша ер азаматтарды мерекемен құттықтап, табыс тіледі.
Исатай ауданы: «Қайсар рух – мәңгілік ел тірегі»
Исатай ауданындағы шараның басты мақсаты — әскери қызметкерлер мен ардагерлерге құрмет көрсету арқылы жас ұрпақты патриоттық рухта тәрбиелеу болды. Аудан әкімі Нұрым Мусин Отан қорғаушылардың ерен еңбегіне тоқталып, бірқатар азаматты марапаттады.
Ғ. Мәсәлімов атындағы орта мектептің алғашқы әскери дайындық пәні мұғалімі Парух Қабиев мерекенің тәрбиелік мәніне тоқталды:
«Бұл мереке жастарымызды қазақи патриотизмге, елін, жерін сүюге тәрбиелеуге зор әсерін тигізеді. Бұл — әрбір ер азаматтың рухын көтеретін маңызды күн», — деді ол.
Мақат ауданы: Сала үздіктері марапатталды
Мақат ауданында аудан әкімі Азамат Мәмбетов ел қауіпсіздігін қамтамасыз етуде аянбай еңбек етіп жүрген 20-ға жуық қызметкерді салтанатты түрде марапаттады. Олардың қатарында ауданның әлеуметтік-экономикалық дамуына үлес қосып жүрген түрлі сала мамандары бар.
Мақат аудандық полиция бөлімінің жедел кезекшісі Данияр Хасанов 18 жылдық еңбегінің еленгеніне ризашылығын білдірді:
-
«Бүгін аудан әкімінен алғыс хат алып жатқаныма өте қуаныштымын. Барша әріптестерімді мерекемен құттықтаймын, еңбектеріңізге жеңіс тілеймін», — деді марапат иесі.
Аудан орталықтарында өткен барлық шаралар патриоттық әндер шырқалған концерттік бағдарламалармен қорытындыланды. Бұл мейрам өңірдегі ер азаматтардың ел алдындағы жауапкершілігі мен айбынын тағы бір мәрте айшықтады.
