Caspian News, 2 қыркүйек. Атырау облысының Исатай ауылында заманауи талаптарға сай қайта салынған теміржол вокзалы салтанатты түрде ашылды. Жарты ғасырдан астам тарихы бар ескі ғимарат толығымен сүріліп, орнына жергілікті тұрғындар мен жолаушылар үшін барлық қолайлы жағдайы бар жаңа нысат бой көтерді.
Бұл — Исатай ауданы бойынша қайта жаңғыртудан өткен екінші теміржол вокзалы. Бұған дейін аудан орталығы Аққыстау ауылындағы вокзал күрделі жөндеуден өткен болатын.
🏢 Жаңа вокзалдың мүмкіндіктері мен инфрақұрылымы
Жалпы аумағы 215 шаршы метрді құрайтын жаңа ғимараттың қасбеті мен ішкі бөлмелері толықтай жаңартылып, барлық инженерлік коммуникациялар ретке келтірілді:
-
Инженерлік жүйелер: Жылу, су және электр желілері заманауи стандарттарға сәйкес қайта тартылды.
-
Күту залдары: Жолаушылар үшін жаздың ыстығында салқындатқыш, қыстың күні жылу беретін кең әрі жарық күту залы жасақталды.
-
Арнайы бөлмелер: Ана мен бала бөлмесі және мүмкіндігі шектеулі азаматтарға арналған кедергісіз инфрақұрылым қарастырылған.
Аралбай ҚОСЫМБАЕВ, «ҚТЖ» ҰК» АҚ – «Атырау магистралдық желі бөлімшесінің» басшысы:
«Бұл — Исатай ауылының тұрғындары үшін үлкен қуаныш. Вокзал — кез келген елді мекеннің өзіндік қақпасы. Заманауи жағдайда салынған бұл нысан халыққа сапалы әрі жайлы қызмет көрсетеді деп сенеміз».
👴 Тұрғындар мен теміржол ардагерлерінің қуанышы
Жаңа нысанның ашылуына ауыл тұрғындары мен осы салада ұзақ жылдар еңбек еткен ардагерлер арнайы қатысып, өз өңірлеріндегі оң өзгеріске жоғары баға берді.
Құрманбек КЕНЖЕШОВ, Исатай ауылының тұрғыны, теміржол саласының ардагері:
«Мен 1975 жылдан 2015 жылға дейін осы Исатай стансасында жол шебері болып еңбек еттім. Үш ұрпақпен бірге жұмыс істеп, бүкіл саналы ғұмырымды осы салаға арнадым. Вокзалдың былайша заманауи түрде қайта бой көтергені — келешек ұрпақ пен ауыл халқы үшін жасалған үлкен игілік».
🇰🇿 Республикалық және өңірлік кешенді бағдарлама
Еліміздегі теміржол вокзалдарының 70 пайызға жуығы 30 жылдан астам уақыт бойы күрделі жөндеу көрмеген. Осыған байланысты 2025 жылы республика бойынша 124 теміржол вокзалын кешенді жаңғырту бағдарламасы қолға алынған болатын.
Атырау облысы бойынша жоспарланған 9 вокзалдың 6-ауы бүгінде толық жөндеуден өтіп, ел игілігіне пайдалануға берілді.