Caspian News, 18 тамыз. Мектеп сөмкесінің салмағы баланың өз дене салмағының 10 пайызынан аспауы тиіс. ҚР Денсаулық сақтау министрлігі жаңа оқу жылы қарсаңында оқушылардың омыртқа саулығын сақтау бойынша маңызды ұсыныстарды жариялады.
Мамандардың айтуынша, күнделікті ауыр жүк көтеру баланың дене сымбатын (осанкасын) бұзып, омыртқасына шамадан тыс күш түсіреді.
⚖️ Сөмке мен оқу құралдарының салмақ нормалары
1. Сөмкенің бос күйіндегі салмағы:
-
Бастауыш сыныптар: 700 грамнан аспауы керек.
-
Орта және жоғары сыныптар: 1 келіден аспауы тиіс.
2. Ішіндегі оқу құралдарының рұқсат етілген салмағы:
-
1–3 сыныптар: 2 кг дейін;
-
4–5 сыныптар: 2,5 кг дейін;
-
6–7 сыныптар: 3,5 кг дейін;
-
8–11 сыныптар: 4,5 кг дейін.
(Мысалы: Салмағы 30 кг оқушының мектепке апаратын сөмкесі барлық заттарымен қосқанда 3 кг-нан аспағаны жөн).
⚠️ Сөмкенің ауыр екенін білдіретін белгілер
Салауатты өмір салтын қалыптастыру дәрігері Гүлден Тілектес:
«Егер рюкзакты көтерген кезде бала алға қарай қатты еңкейсе, иығын төмен түсірсе немесе денесін бір жаққа қисайтса, бұл сөмкенің дұрыс таңдалмағанын немесе тым ауыр екенін білдіреді. Егер арқа, мойын, иық ауруы, бұлшықет әлсіздігі немесе қолдың ұюы байқалса, тез арада педиатрға немесе ортопед-травматологқа қаралу қажет».
💡 Дұрыс сөмке таңдау бойынша кеңестер
-
Ортопедиялық арқалық: Сөмкенің арқа жағы тығыз әрі анатомиялық ыңғайлы болуы керек.
-
Иықбаулар: Ені кең, жұмсақ әрі ұзындығы баланың бойына шақтап реттелетін сөмкелер салмақты екі иыққа біркелкі бөледі.
-
Бақылау: Ата-аналарға күнделікті сөмкеге тек сол күнге қажетті сабақ құралдарын ғана салу ұсынылады.