Caspian News, 31 шілде. Атырауда инфрақұрылымды жаңартуға бағытталған жалпы құны 153,3 миллиард теңгені құрайтын ауқымды жобалар қолға алынады. Бұл жұмыстар Мемлекет басшысының тапсырмасымен 2025 жылдан бастап жүзеге асырылып жатқан «Энергетикалық және коммуналдық секторларды жаңғырту» ұлттық жобасы аясында орындалуда.
Өңірдегі 3 танымал монополист мекеме – «Атырау Жарық» ЖШС, «Атырау жылу жүйелері» ЖШС және «Атырау облысы Су Арнасы» КМК желілер мен стансаларды кезең-кезеңімен жаңартады.
⚡ 1. «Атырау Жарық» ЖШС (Жоба құны: 110,7 млрд теңге)
Ең ауқымды әрі ірі жоба электр желілерін жаңғыртуға бағытталған.
-
2026–2027 жылдары: 403 шақырымнан астам электр желісі жаңартылады. Қазірдің өзінде 9 жоба бойынша мердігер мекемелер анықталып, құрылыс жұмыстары басталып кетті.
-
2027–2028 жылдары: Тағы 822 шақырым электр желісін жаңғырту жоспарланған.
-
Нәтижесі: 2030 жылға қарай өңірдегі электр желілерінің тозу деңгейі 67,3 пайыздан 45,5 пайызға дейін төмендейді.
🔥 2. «Атырау жылу жүйелері» ЖШС (Жоба құны: 12,3 млрд теңге)
Жоба аясында шаһардағы 22,9 шақырым жылу желісі толық жаңғыртудан өтеді.
-
1-кезең (2026–2027 жж.): 7,99 шақырым жылу желісі жөнделеді. Қазір конкурс рәсімдері толық аяқталып, мердігермен келісімшарт жасалды.
-
2-кезең (2027–2028 жж.): Тағы 7,7 шақырым желіні жаңартуға арналған жоба келісу кезеңінде тұр.
-
Нәтижесі: Жоба толық іске асқанда Атырау қаласындағы жылу желілерінің тозуы 62,3 пайыздан 51 пайызға дейін азаяды.
💧 3. «Атырау облысы Су Арнасы» КМК (Жоба құны: 30,3 млрд теңге)
Су Арнасы мекемесі қаланың кәріз-тазарту инфрақұрылымын жақсартуды қолға алады.
-
Жоба аясында: 4 кәріздік сорғы (насос) стансасы толық жаңғыртылады.
-
Қаржыландыру: 2026–2027 жылдары бұл мақсатқа 6,7 млрд теңге қарастырылған.
-
Қазіргі жағдайы: Құзырлы органдардың рұқсаты мен келісімдері алынып, мердігерді анықтау процедуралары аяқталды. Жақын күндері екіжақты келісімшартқа қол қойылады.
🎙️ Ресми өкілдің пікірі
Дінмұхамед ЛҰҚПАНОВ, Атырау облысы энергетика және ТҮКШ басқармасының бас маманы: «Қазіргі таңда «Атырау Жарық» және «Атырау жылу жүйелері» ЖШС-нің жобалық-сметалық құжаттамасы дайындалуда. Ал «Атырау облысы Су Арнасы» дайын тұр. Алдағы уақытта сараптамадан өткеннен кейін тиісті жұмыстарды бастайтын болады».