Caspian News, 10 маусым. Батыс Қазақстан облысының Жаңақала ауданында 3 жасөспірім суға кетіп, қаза тапты. Қайғылы оқиға кеше, 9 маусым күні кешкі уақытта Жаңақазан ауылының маңында болған.
Алдын ала деректерге сәйкес, 2008 және 2009 жылы туған жасөспірімдер Елек өзенінің саласы – Кіші Өзенге шомылуға түскен. Аталған аумақта «Шомылуға тыйым салынады!» деген ескерту белгісі орнатылғанына қарамастан, қауіпсіздік талаптары сақталмауы орны толмас қайғылы жағдайға әкеліп соққан.
Төтенше жағдайлар департаментінің мәліметі
БҚО ТЖД төтенше жағдайларды жою басқармасының бастығы Бақытжан Ихсановтың хабарлауынша, құтқарушылар жеткенше балалардың денесі судан шығарылып қойған:
«Оқиға орнына Батыс Қазақстан облысы ТЖД жеке құрамы мен күштік бірліктері жедел жіберілді. Алайда, департамент бөлімшелері жеткенге дейін қаза болған жасөспірімдердің денелері жергілікті тұрғындардың күшімен судан шығарылды. Қазіргі уақытта оқиғаның мән-жайы мен нақты себептері анықталуда».
Шомылу маусымындағы қауіпсіздік: Статистика алаңдатады
Жазғы шомылу маусымы басталғалы Батыс Қазақстан облысында суға кету оқиғалары жиілеп кетті. Бұған дейін аймақта 11 және 15 жастағы жасөспірімдердің суға кету деректері тіркелген болатын.
МАҢЫЗДЫ ЕСКЕРТУ: Төтенше жағдайлар қызметі ата-аналардан балаларды су айдындарының маңында қараусыз қалдырмауды, тек рұқсат етілген орындарда ғана шомылуды және қауіпсіздік ережелерін қатаң сақтауды сұрайды. Арнайы белгі қойылған, шомылуға тыйым салынған беймәлім су қоймалары өмірге аса қауіпті!