Caspian News, 4 маусым. Атырауда мемлекеттік қызметкерлер арасында «Заң. Логика. Бәсеке» тақырыбында жаңа форматтағы танымдық квиз (зияткерлік турнир) өтті. Мемлекеттік қызметшілердің құқықтық сауаттылығын арттыруға бағытталған бұл сайысқа өңірдегі түрлі мемлекеттік органдардан 22 командаға біріккен 120-дан астам қатысушы жиналып, өзара бақ сынасты.
Зияткерлік дода монополияға қарсы орган қызметкерлерінің кәсіби мерекесіне орайластырып ұйымдастырылды. Ойын барысында қатысушылар еліміздегі қолданыстағы заңнамалар, мемлекеттік қызметтің негізгі қағидаттары, құқықтық тәртіп мәселелері және сыбайлас жемқорлыққа қарсы саясат бағыттары бойынша күрделі сұрақтарға жауап берді. Сонымен қатар, логикалық тапсырмалар арқылы өздерінің аналитикалық ойлау қабілеттері мен командада жедел, әрі дұрыс шешім қабылдау дағдыларын жоғары деңгейде көрсете білді.
Мерейтойлық шара: «Монополияға қарсы қызметке 35 жыл»
Ұйымдастырушылар кәсіби мерекенің маңызы мен сайыстың өткізілу мақсатына кеңінен тоқталып өтті.
Әсел Әдиева, ҚР Бәсекелестікті қорғау және дамыту агенттігінің Атырау облысы бойынша Департаменті басшысының орынбасары: «Биыл Қазақстан Республикасында монополияға қарсы қызмет органдарының құрылғанына 35 жыл толып отыр. Сонымен қатар, 7 маусым — монополияға қарсы орган қызметкерлерінің ресми кәсіби мерекесі болып табылады.
Осы айтулы мереке аясында ҚР Мемлекеттік қызмет істері агенттігінің Атырау облысы бойынша департаментінің қолдауымен, сондай-ақ ішкі саясат басқармасының «Жастар ресурстық орталығымен» бірлесе отырып, мемлекеттік қызметшілерге арналған «Заң, логика және бәсеке» атты интеллектуалдық квиз турнирін жоғары деңгейде ұйымдастырып, өткізіп жатырмыз.»
Зияткерлік сайыстың қорытындысы мен жеңімпаздары
Тартысты өткен білім додасының нәтижесінде үздік білімімен, шапшаңдығымен және логикалық ұшқырлығымен ерекшеленген келесі ұжымдар жеңіс тұғырынан көрінді:
-
🥇 І орын: Халықты әлеуметтік қорғау саласындағы реттеу және бақылау комитетінің Атырау облысы бойынша департаментінің командасы;
-
🥈 ІІ орын: Атырау облыстық сотының намысын қорғаған құрама команда;
-
🥉 ІІҮ орын: Үздік үштікті Құрманғазы ауданы әкімдігі аппаратының қызметкерлерінен құралған команда түйіндеді.
Сайыс соңында оқ бойы озық шыққан жеңімпаздар мен жүлдегерлер, сондай-ақ белсенділік танытқан өзге де ұжымдар арнайы дипломдармен және алғыс хаттармен салтанатты түрде марапатталды. Осындай интеллектуалдық шаралар мемлекеттік қызметшілердің кәсіби біліктілігін шыңдап қана қоймай, ведомствоаралық әріптестік байланысты нығайтуға да зор септігін тигізеді.