Caspian News, 22 мамыр. Атырау облысының Мақат ауданында еліміздің экологиялық мәдениетін жаңа деңгейге көтерген тарихи оқиға орын алды. Бір мезетте ауданның 2000-нан астам тұрғыны бірігіп, ауқымды экологиялық фестивальге қатысты. Нәтижесінде бұқаралық сипат алған шара Азия және Африка елдері бойынша Дүниежүзілік рекордтар кітабына (Global Best Of Records) ресми түрде тіркелді.
Экологиялық акция барысында тұрғындар небәрі 3 сағаттың ішінде 21 шақырымдық аумақты қоқыстан толықтай тазартып, 12 тонна қалдық жинады.
«Бұл — адамзатқа үлгі болатын ерекше акция»
Халықаралық ұйым өкілдері Мақат тұрғындарының бұл қадамы жеке мүдде үшін емес, жаһандық табиғатты қорғауға бағытталған бірегей қозғалыс екенін жоғары бағалады.
Қуандық Құдайбергенов, Дүниежүзілік рекордтар кітабының Азия және Африка елдері бойынша бас тіркеу офицері:
«Мұндай ауқымды әрі игі шара бұған дейін Дүниежүзілік рекордтар кітабына мүлдем түспеген. Әлемдік деңгейде қоршаған ортаны жақсартуға бағытталған бұқаралық іс-әрекеттер өте сирек қайталанады. Бұл — өте керемет бастама. Комиссия 2 мыңнан астам қатысушының аты-жөні жазылған толық тізімді Дүниежүзілік рекордтар кітабына енгізу туралы жалпы шешім қабылдады. Тұрғындар бұл жетістікті өз абыройы үшін емес, табиғат пен адамзат үшін жасады. Мақат ауданы барлық адамзат баласына үлгі болсын».
Таңғы сағат 06:00-де бастау алған «Eco Steppe Fest Makat» экологиялық фестивалі тек сенбілікпен шектелген жоқ. Оның аясында арнайы тақырыптық көрмелер, жастарға арналған экосабақтар мен танымдық іс-шаралар ұйымдастырылды. Ұйымдастырушылардың айтуынша, бұл креативті идея Мемлекет басшысының бастамасымен қолға алынған «Таза Қазақстан» жалпыұлттық бағдарламасын жаңаша үлгіде іске асыру мақсатында туындаған.
«Өз тері төгілген жерге ешкім қоқыс тастамайды»
Жергілікті билік өкілдері бұл акцияның тәрбиелік мәніне ерекше тоқталып, ауданда қоршаған ортаны қорғаудың жаңа мәдениеті қалыптасатынына сенім білдірді.
Бақберген Сәлімов, Мақат аудандық ішкі саясат бөлімінің басшысы:
«Біз ел болып, жұрт болып жұмылудың арқасында кереметтей тарихи сәттің куәсі болдық. «Неге біз «Таза Қазақстан» акциясын креативті тұрғыда жақсы насихаттамасқа?» деген ой келді. Әр өңірде сенбіліктер өтіп жатыр ғой. Егер сол шаралардың басын қосып, қатысушылар санын көбейтсек, рекордтар кітабына енерміз деген мақсат қойдық. Сол жоспарымыз бүгін толық жүзеге асты. Бұл жерді өз қолымен тазартқан 2000 адам бұдан былай туған өлкесіне қоқыс шашпайды деп сеніммен айта аламын».
Марапаттау сәті: Фестиваль қорытындысы бойынша Мақат ауданының әкімдігі мен ұйымдастырушылар тобына Global Best Of Records халықаралық ұйымының рекордты ресми растайтын арнайы сертификаты, статуэткасы және ерекше төсбелгісі салтанатты түрде табыс етілді. Шараға үлес қосқан әрбір тұрғынның есімі халықаралық шежіреге жазылды.