Caspian News, 19 мамыр. Атырау қаласында заман талабына сай ойлайтын, стратегиялық шешім қабылдауға қабілетті кәсіби басқарушылар корпусын қалыптастыруға бағытталған ауқымды оқыту семинары өз жұмысын бастады. Х.Досмұхамедов атындағы Атырау университетінде өтіп жатқан шараны «AMANAT» партиясының Саяси менеджмент академиясы ұйымдастырды. Үш күнге созылатын модульдік бағдарлама аясында қатысушылар саяси менеджмент, мемлекеттік басқару, бюджеттік жоспарлау, заманауи коммуникация және көшбасшылық бағыттары бойынша білімдерін жетілдіреді.
Тестілеу және үздік жобаларды қаржыландыру
Оқу бағдарламасының соңында қатысушылардың алған білімі сыналады. Сонымен қатар, кәсіби дағдыны арттырумен қатар нақты тәжірибелік қолдау көрсету де көзделген.
Гүлнәр Нұрахметханова, «AMANAT» партиясы орталық аппараты саяси жұмыс департаменті директорының орынбасары:
«Семинардың қорытындысы бойынша барлық қатысушылар алған білімдеріне сәйкес арнайы тест тапсырады және өз жобаларын қорғайтын болады. Сол жобалардың ішіндегі ең үздік, өзекті деп танылғандарын кейін инвестиция тарту арқылы қаржыландыруды мақсат етіп отырмыз. Жалпы, бұл — “AMANAT” партиясының саяси көшбасшылық қабілеттерді дамыту және өңірлерді өркендету бағытындағы маңызды қадамдарының бірі».
130 басқарушы іріктеуден өтті
Оқыту бағдарламасына қатысу үшін өңірдегі ауыл әкімдері, жергілікті мәслихат депутаттары, партия қызметкерлері мен бастауыш партия ұйымдарының (БПҰ) өкілдері арасынан 130 адам арнайы іріктеліп алынған. Олар отандық және шетелдік білікті сарапшылар дайындаған 6 арнайы модульден тұратын бірегей оқу курсынан өтеді.
Бейбіт Мырзағалиев, «AMANAT» партиясы Атырау облыстық филиалының төрағасы:
«Бұл оқудың маңызы өте жоғары. Біздегі барлық ауылдық округтердің әкімдері партия атынан ұсынылып, халықтың тікелей қолдауымен сайланған азаматтар. Осы себептен де біз олармен тиімді жұмыс ұйымдастыру, ауылдық округтерді дамыту және округ әкімдерінің сайлауалды бағдарламаларын уақытылы әрі сапалы жүзеге асыру мәселесіне ерекше көңіл бөліп отырмыз».
Өңірде кадр даярлаудың жаңа жүйесі қалыптасады
Кіріспе бөлімнен кейін қатысушылар арнайы топтарға бөлініп, оқу модульдері бойынша тәжірибелік семинар сабақтарына кірісті. Сонымен қатар, шара аясында жергілікті базаны нығайту бойынша маңызды келісім жасалды.
Саламат Идрисов, Х.Досмұхамедов атындағы Атырау университетінің басқарма төрағасы – ректоры:
«Біз бүгін “Аманат” партиясының Саяси менеджмент академиясымен өзара ынтымақтастық туралы меморандумға қол қойдық. Осының нәтижесінде университет ішінен өзіміздің тиісті құрылымымызды қалыптастыратын боламыз. Оқу орнымыздың оқытушылары осы бағдарламаны оқып үйреніп, алдағы уақытта жергілікті кадрларды даярлау кезінде осындай заманауи бағыттағы оқу жұмыстарын дербес жүргізе алады».
Ұйымдастырушылардың мәлімдеуінше, бұл модульдік оқыту бағдарламасы партияның өңірлік филиалдарының кадрлық әлеуетін айтарлықтай арттырып, жергілікті басқару жүйесіндегі мамандардың кәсіби біліктілігін нығайтуға жаңа серпін береді.