Caspian News, 18 мамыр. Атыраудағы Абай атындағы оқушылар орталығында мұғалімдердің кәсіби біліктілігін арттыруға бағытталған «Ғылыми ізденіс: нәтижеге жету құпиясы» атты облыстық ғылыми-тәжірибелік семинар өтті. Таланттарды анықтау және қолдау орталығы мен «Ғылым дәуірі» қоғамдық бірлестігі ұйымдастырған шараға облыстың түкпір-түкпірінен таңдаулы ұстаздар жиналды.
Жоғары бәсекелестік: 400 өтініштің ішінен 100 мұғалім іріктелді
Ұйымдастырушылардың мәліметінше, бұл жолғы семинарға қатысуға ниет білдірген педагогтердің саны өте көп болған. Жалпы саны 400-ден астам өтініш түскенімен, арнайы іріктеудің нәтижесінде тек 100 мұғалімге ғана жолдама берілді. Бұл шараның маңыздылығы мен оған деген қызығушылықтың қаншалықты жоғары екенін көрсетеді.
Семинарда алты спикер зерттеуге негізделген оқыту, инженерлік және дизайн бағыттарын кіріктіру, пәндер арасындағы байланысты күшейту бойынша дәріс оқыды.
STEAM әдістемесі — заман талабы
Басқосудың негізгі өзегі — мектептердегі жаратылыстану пәндерін заманауи технологиялармен ұштастыра оқыту болды. Мамандардың айтуынша, бұл бағыт оқушылардың болашақ мамандығын қателеспей таңдауына септігін тигізеді.
Гүлнұр Кенжеева, STEAM тренер:
«STEAM оқыту — оқушылардың ғылыми тұрғыда барлық дағдылары мен білімдерін дамытатын бірегей методика. Ол балаларға алған теориялық білімін нақты өмірлік проблемаларды шешуде қалай пайдалануға болатынын түсіндіреді. Бұл әдіс физика, химия, география, биология сабақтарында мұғалімдерге бағыт-бағдар беріп, сабақтың сапасын арттырады».
Жобаларды бағалаудың жаңа халықаралық стандарты
Семинар аясында ғылыми жобалардың әділдігі мен ашықтығын қамтамасыз ету мәселесі де кеңінен сөз болды. Қазіргі таңда балалардың еңбегін бағалау толықтай цифрландырылған.
Жанар Сәрсенғалиева, Таланттарды анықтау және қолдау орталығы директорының орынбасары:
«Біз ғылыми жобалардың адал әрі әділ бағалануына үлкен басымдық береміз. Осы мақсатта халықаралық стандарттарға сай, ғылыми жобаны бағалау жүйесін өзгерттік. Арнайы кабиналар жасақталды. Әділқазылар оқушының аты-жөнін, қай мектептен келгенін білмейді, постерлерде бәрі жасырын болады. Секция бойынша дербес бағалау жүргізілген соң, еріктілер ұпайларды компьютерге енгізеді, ал жүйе қорытынды нәтижені автоматты түрде шығарады».
Жас зерттеушілердің көрмесі
Теориялық бөлімнен бөлек, семинар аясында дарынды оқушылардың көрмесі ұйымдастырылды. Шара барысында 68 оқушы өздері әзірлеген 30 ғылыми жобаны сарапшылар мен қонақтардың назарына ұсынды. Жас зерттеушілердің тың идеялары мен шығармашылық ізденістері қатысушылар тарапынан жоғары бағаланды.
Мұндай ғылыми-тәжірибелік алаңдар Атырау облысындағы білім беру сапасын арттырып, мұғалімдердің ғылыми-зерттеу әлеуетін жаңа деңгейге көтеруге мүмкіндік береді.