Caspian News, 13 мамыр. Парламент Мәжілісінің жалпы отырысында ұялы байланыс тарифтерінің негізсіз өсуі мен интернет сапасының төмендігі қызу талқыға түсті. Депутаттар байланыс операторларының баға саясатын қатаң тексеруді талап етіп отыр.
Тарифтердің күрт өсуі
Депутат Нартай Сәрсенғалиевтің мәлімдеуінше, соңғы екі жылда елімізде байланыс қызметінің құны айтарлықтай өскен. Кейбір бағыттар бойынша өсім тіпті ақылға сыйымсыз көрсеткішке жеткен.
«2022-2023 жылдан бері тарифтер 20-дан 90 пайызға дейін өсті. Кейбір операторларда бұл көрсеткіш 300 пайызға дейін жетті. Операторлар бағаны өздері белгілегенімен, мемлекет оның қаншалықты негізді екенін тексеретін тетіктерге ие болуы тиіс», — деді халық қалаулысы.
Министрліктің уәжі: «1 Гб құны арзандады»
Цифрлық даму, инновациялар және аэроғарыш өнеркәсібі министрі Жаслан Мәдиев бағаның өскенін мойындады, бірақ оның объективті себептері бар екенін алға тартты.
Министрдің негізгі дәйектері:
-
Инвестиция: Қаражат 5G желісін дамытуға және ауылдарды интернетпен қамтуға жұмсалуда.
-
Трафик: Елдегі интернет тұтыну көлемі 70 пайызға артқан.
-
Есеп: Егер 1 гигабайттың құнын есептесе, байланыс қызметі 15 пайызға арзандаған. Биыл 1 Гб құны орташа есеппен 82 теңгені құрап отыр.
«Тұтынушының құқығын кім қорғайды?»
Депутат Ринат Зайытов министрліктің жауабына көңілі толмайтынын ашық айтты. Ол интернет сапасының нашарлығы мен мазаны алатын жарнамалық қоңырауларға (автодозвон) тосқауыл қойылмай отырғанын сынға алды.
«Сіздердің жауаптарыңыздан түсінгенім — интернет сапасына да, бағасына да араласпайсыздар. Тіпті қажетсіз жарнамалардан да қорғай алмайсыздар. Сонда тұтынушылардың құқығын кім қорғайды? Кімге барып шағымданайық?» — деп сұрау салды Р. Зайытов.
Шағымдану тәртібі және «Автодозвон»
Министр Мәдиев егер интернет сапасы төмен болса, азаматтар ресми түрде өтініш жаза алатынын, сол негізде тексеру жүргізілетінін айтты. Сондай-ақ, ол нарықтағы монополияға қарсы бақылауды күшейтуді қолдайтынын жеткізді.
Мәжілісмен Асхат Аймағамбетов көтерген «автодозвон» мәселесіне қатысты министр бұл ұсынысты егжей-тегжейлі талқылауға уәде берді. Депутаттар байланыс саласындағы заңнаманы қайта қарап, операторлардың бағаны бақылаусыз көтеруіне тосқауыл қою қажеттігін тағы да қадап айтты.
