Caspian News, 7 мамыр. Атырау қаласындағы Сұлтан Бейбарыс алаңында 7 мамыр – Отан қорғаушылар күніне арналған салтанатты жиын өтті. Шара барысында ел қауіпсіздігінің сақшыларына құрмет көрсетіліп, әскери қару-жарақ көрмесі ұйымдастырылды.
Ерлік пен абырой ұлықталған күн
Мерекелік шара аясында Қарулы күштер сапында абыройлы қызмет атқарып, ел қорғау ісіне сүбелі үлес қосқан 10 азамат арнайы марапаттарға ие болды. Атырау облысы әкімінің орынбасары Қайрат Нұртаев жауынгерлерді құттықтап, олардың қоғамдағы маңызды рөлін атап өтті.
«Батыс» өңірлік қолбасшысының орынбасары Азамат Жұмағазиев бұл шараның ведомствоаралық бірлікті көрсететінін жеткізді:
«Біз жергілікті атқарушы органдармен бірлесе отырып, гарнизон әскерилерін, шекара қызметі, Ұлттық ұлан және өзге де әскери құрылым өкілдерін құттықтауды жөн санадық. Бұл — Отан қорғаушылардың мәртебесін асқақтататын маңызды сәт», — деді ол.
Әскери техника мен қару-жарақ көрмесі
Алаңда қала тұрғындары мен қонақтары үшін арнайы әскери көрме ұйымдастырылды. Келушілер заманауи техникалармен танысып, қару-жарақтарды өз көздерімен көруге мүмкіндік алды. Бұл көрме әсіресе жастар мен балалардың ерекше қызығушылығын тудырып, отансүйгіштік рухты нығайтуға септігін тигізді.
Ақтөбеден келіп, Атырау гарнизонында қызмет етіп жатқан қатардағы жауынгер Диас Қайдаулов өз әсерін былайша білдірді:
-
«Менің әскерге келгеніме бір айдан асты. Барлығы жақсы, қызметке үйреніп қалдым. Барша қазақстандықтарды мерекемен құттықтаймын, елімізде әрқашан бейбітшілік болсын!» — деді жас сарбаз.
Ұрпақтар сабақтастығы
Мерекелік шараның тағы бір маңызы — аға буынның ерлік дәстүрін жаңғырту. Отан қорғаушылар күнінің Ұлы Жеңіс мерекесімен тұспа-тұс келуі — өткен күннің қаһармандығы мен бүгінгі күннің айбынын ұштастырып тұрғандай.
Салтанатты жиын патриоттық әндер шырқалып, әскери қызметшілердің саптық шеруімен қорытындыланды. Атыраулықтар бұл күні өз қаһармандарын мақтан тұтып, ерекше көңіл-күймен тарқасты.
