Caspian News, 6 мамыр. Мақат балалар-жасөспірімдер спорт мектебінде Жеңіс күні қарсаңында Кеңес Одағының Батыры Мұса Баймұхановты еске алуға арналған еркін күрестен республикалық турнир мәресіне жетті. Дәстүрлі додаға еліміздің батыс өңірлерінен ең мықты жас палуандар жиналды.
Жарыс географиясы мен ауқымы
Биылғы байрақты бәсекеге Маңғыстау, Батыс Қазақстан, Ақтөбе облыстарынан, сондай-ақ Атырау өңірінің Құрманғазы, Жылыой және Мақат аудандарынан 200-ге жуық спортшы қатысты. Екі күнге созылған белдесулерде 2011-2012 жылдары туған жасөспірімдер 11 салмақ дәрежесі бойынша бақ сынады.
Тарихы терең турнир
Мақат аудандық мәдениет, тілдерді дамыту, дене шынықтыру және спорт бөлімінің басшысы Нұрлан Исполовтың айтуынша, бұл жарыстың өңір үшін орны ерекше:
«Бұл турнир 1972 жылдан бері өткізіліп келе жатқан тарихы терең дода. Басты мақсатымыз – еркін күрес спортын дамыту, жастарды салауатты өмір салтына баулу және батырымыз Мұса Баймұхановтың ерлік жолын өскелең ұрпаққа насихаттау. Осы мектептен шыңдалған талай спортшымыз халықаралық ареналарда топ жарып жүр», — деді бөлім басшысы.
Боз кілемдегі бәсеке
52 келі салмақ дәрежесінде жеңімпаз атанған маңғыстаулық палуан Жанжігіт Базарбай өз әсерімен бөлісті:
-
«Мен 5 рет белдесіп, чемпион атандым. Мұндай жарыстар бізді шыңдайды. Мақаттағы турнир жоғары деңгейде өтті. Осындай бәсекелер көбейсе, болашақта Әлем және Қазақстан чемпиондары көптеп шығады», — дейді жас спортшы.
Мақаттықтардың нәтижесі
Жарыс қорытындысы бойынша Мақат ауданының намысын қорғаған жасөспірімдер жоғары дайындықтарын көрсетіп, олжалы болды:
-
1 алтын жүлде;
-
4 күміс жүлде;
-
5 қола жүлде.
Барлық жеңімпаздар мен жүлдегерлерге арнайы дипломдар, кубоктар мен медальдар табысталды. Турнир ұйымдастырушылары спортшылардың шеберлігі жылдан-жылға артып келе жатқанын атап өтті.
