Caspian News, 5 мамыр. Қазақстанда биыл 130 шақырым жылу және 10,5 мың шақырым электр желісін жаңарту жоспарланып отыр. Үкімет өткен қыстың апатсыз өткенін алға тартқанымен, саладағы инфрақұрылымның тозу деңгейі әлі де жоғары — кей жерлерде ескіру көрсеткіші 60%-дан асады.
Инвестицияға айырбасталатын тариф
Мемлекет басшысының тапсырмасына сәйкес, «Тарифті инвестицияға айырбастау» бағдарламасы аясында биыл электр станцияларын жаңғыртуға 384 млрд теңге қаралған. Бұл өткен жылмен салыстырғанда 9%-ға көп. Сондай-ақ, Үкімет резервінен Жетісу, Абай, Ақмола және Шығыс Қазақстан облыстарындағы жылу жүйелерін жөндеуге қосымша 25 млрд теңге бөлінді.
Премьер-министр Олжас Бектенов әкімдерге дайындықты қазірден бастауды қатаң тапсырды:
«Ойланып-толғанып жүруге уақыт жоқ. Барлық жұмыс белгіленген мерзімде орындалуы тиіс. Жаз бойы жұмысты күшейтіңіздер. Бұл — өңірлердің алдында тұрған негізгі міндет», — деді Үкімет басшысы.
Тариф бағасы қалай өзгереді?
Инфрақұрылымды жөндеуге қомақты қаржы бөлінгенімен, энергетика саласындағы берешек мәселесі әлі күнге дейін өзекті. Бүгінде энергия өндіруші ұйымдардың «QAZAQGAZ AIMAQ» компаниясына қарызы 37,7 млрд теңгеге жеткен.
ҚР Энергетика вице-министрі Сұңғат Есімхановтың айтуынша, бұл берешек алдағы уақытта тарифтер есебінен жабылуы мүмкін. Алайда, өсім айтарлықтай жоғары болмайды деп күтілуде.
-
Болжамды өсім: Тариф орташа есеппен 4-5% деңгейінде өсуі ықтимал;
-
Себебі: Негізінен газ бағасының көтерілуі, жөндеу жұмыстары және мамандардың еңбекақысы;
-
Процесс: Тариф бірден көтерілмейді. Алдымен өтінімдер қаралып, қоғамдық тыңдаулар өткізілуі тиіс. Бұл процеске бірнеше ай уақыт кетеді.
Қысқа дайындық басты назарда
Вице-министр тарифтің өсуі халыққа ауыр тимейтіндей деңгейде қарастырылып жатқанын жеткізді. Қазіргі таңда негізгі күш жылу желілерін сынақтан өткізуге және жабдықтарды ауыстыруға жұмылдырылған. Тұрғындар үшін басты мәселе — төлемнің өсуі ғана емес, келер қыста үйлердің жылы әрі қауіпсіз болуы болып қала бермек.
