By Caspian News, 6 ақпан. Семей қаласында тұрғындарды шошытқан жағдай орын алды. Қоқыс жәшігінен сүлгіге оралған жаңа туған нәрестенің денесі табылды. Бұл туралы Абай облыстық Полиция департаменті ресми мәлімдеме жасады, деп хабарлайды AlatauNews.
Қайғылы жағдай 3 ақпан күні белгілі болған. Жедел-іздестіру шараларының нәтижесінде полиция қызметкерлері күдіктіні бірден анықтады.
Күдікті мен оқиғаның мән-жайы
Полиция мәліметінше, күдікті ретінде үйде босанған 20 жастағы бойжеткен ұсталды. Жауап алу кезінде бойжеткен сәбидің өлі туылғанын алға тартқан. Сондай-ақ, тергеу барысында нәрестенің денесін қоқысқа апарып тастауға көмектескен тағы бір қала тұрғыны анықталды.
Тергеу барысы
Қазіргі уақытта аталған факті бойынша сотқа дейінгі тергеу амалдары жүріп жатыр. Оқиғаның нақты мән-жайын анықтау үшін бірқатар сараптамалар тағайындалды.
«Нәрестенің денесі сараптамаға жіберілді. Сараптама қорытындысы бойынша процессуалдық шешім қабылданып, оқиғаға қатысушы екі тұлғаның да іс-әрекетіне құқықтық баға беріледі», — деп хабарлады Абай облыстық ПД өкілдері.
Мамандар сараптама нәтижесі сәбидің шынымен өлі туылғанын немесе туылғаннан кейін шетінегенін анықтайтынын айтады. Соған байланысты күдіктілердің жазасы белгіленбек.
