By Caspian News, 27 қараша. Атырауда Атырау мұнай өңдеу зауытына (АНПЗ) 10 жыл мерзімге экологиялық рұқсат беру мәселесі бойынша қоғамдық тыңдаулар өтті. Кездесуде зауыттың қоршаған ортаны қорғау бағытындағы шаралары таныстырылды.
Зауыттың инвестициялық жобалар жөніндегі директорының орынбасары Наиль Хакимовтың айтуынша, соңғы жылдары зиянды шығарындыларды азайтуға бағытталған бірқатар жұмыстар атқарылған.
Наиль Хакимов:
«1945 жылғы алғашқы қайта өңдеу қондырғысында пештердің табақшалары (тарелкалары) ауыстырылды. Бұл шығарындыларды төмендетуге мүмкіндік берді. “Таза Қазақстан” бағдарламасы аясында АНПЗ және санитарлық-қорғау аймағы аумағында 5 мыңнан астам көшет отырғызылды».
Бүгінде Атырау мұнай өңдеу зауытының жылдық қуаты – 5,5 млн тонна. 2025 жылдан бастап Қазақстандағы 50 ірі кәсіпорын кешенді экологиялық рұқсат алуға міндетті. 2031 жылы бұл талап 1 санаттағы барлық кәсіпорындарға кеңейтіледі.
Зауыттың еңбек қорғау, экология және азаматтық қорғау департаментінің директоры Еркін Сүлейменов экологиялық рұқсаттың мәнін түсіндірді.
Еркін Сүлейменов:
«Кешенді экологиялық рұқсат зауытқа жаңа экологиялық жобаларды енгізуге мүмкіндік береді. Мәселен, таза суды дайындау, биологиялық тазарту қондырғыларын жаңғырту жобалары өзеннен алынатын су көлемін азайтып, қалдық суларды тастауды төмендетеді».
Қоғамдық тыңдауларға мемлекеттік органдар өкілдері, экологтар, белсенділер, журналистер және қала тұрғындары қатысты. Кейбір тұрғындар рұқсатты 10 жылға беру экологияға кері әсер етуі мүмкін екенін айтты.
Болат Сандыбайұлы, қала тұрғыны:
«Олар 10 жылға рұқсат сұрап отыр, бірақ ондайға жол бермеу керек. Зауыт әр екі жыл сайын халыққа есеп беріп отыруы тиіс. Егер ұзақ мерзімге рұқсат алса, бақылау әлсірейді. Бүгін олар күкірт қышқылы шығарындыларын 27% төмендеткенін айтты. Ал неге 50%-ға түсірмейді? Біз күн сайын осы ауамен тыныстаймыз».
Тыңдауда зауытта понтондар, дискілер, «оттекті жастықшалар» орнату және жиі істен шығатын пештердің техникалық бөлігін жаңғырту жоспарлары айтылды. Алайда экологиялық ұйымдар өкілдері 10 жылдық рұқсат экология үшін «қауіпті шешім» болуы мүмкін деп санайды.
