By Caspian News, 24 қараша. Атырау облысының Құлсары қаласы тұрғындары Жылыой ауданын экологиялық аймақ деп тану туралы мәселе көтерді. Бұл сауалға Мәжіліс депутаты Еділ Жаңбыршин 24 қарашада парламенттің Instagram парақшасында өткен тікелей эфир барысында жауап берді.
Депутаттың айтуынша, белгілі бір аумаққа «экологиялық аймақ» мәртебесін беру – жергілікті атқарушы органдардың құзырындағы мәселе. Мұндай шешім қабылдау үшін арнайы байқау жарияланып, ғылыми ұйымдар тарапынан кешенді зерттеу жүргізілуі тиіс.
«Ауданның экологиялық аймаққа жататынын немесе жатпайтынын ғылыми түрде дәлелдеу қажет. Өйткені бұл мәртебеге ие өңірлерге бюджеттен белгілі бір жеңілдіктер мен қолдаулар қарастырылады», – деді Жаңбыршин.
Депутат тұрғындарды сабырлық танытуға шақырып, мәселені заң аясында шешу қажеттігін атап өтті. Оның айтуынша, бұған дейін Маңғыстау облысына қарасты Бейнеу ауданы да ұқсас бастама көтерген. Олар Арал өңірінен жететін тұздың зиянын негіз ретінде көрсеткен.
Жылыой ауданы – мұнайлы Теңіз кен орны орналасқан өңір. Тұрғындар соңғы жылдары өндірістің қоршаған ортаға әсеріне қатысты шағымдарды жиі көтеріп жүр. Алайда Қазақстанда ресми түрде экологиялық апат аймағы деп танылған өңірлер әзірге Семей және Арал аймақтары ғана.
Мәртебенің жоқтығына байланысты Жылыой тұрғындары экологиялық жеңілдіктер мен әлеуметтік қолдауларға қол жеткізе алмай отыр.
