Сотқа отбасындағы жанжалқойды тұрғын үйден уақытша шығару құқығы берілмек. Бұл туралы ІІМ Әкімшілік полиция комитеті төрағасының міндетін атқарушы Ренат Зулхаиров айтты.
«2023 жылғы 8 желтоқсанда Президенттің Жарлығымен бекітілген Адам құқықтары және заңның үстемдігі саласындағы іс-қимыл жоспарына сәйкес, бала құқықтары жөніндегі уәкілмен және Мәжіліс депутаттарымен бірлесіп, әйелдер мен балалардың құқығын қорғау, сондай-ақ отбасы құндылықтарын ілгерілету шараларын күшейту жөнінде заңнамалық түзетулер әзірленді. Денсаулыққа қасақана жеңіл зиян келтіруді және ұрып-соғуды қылмыстық жауапкершілікке тарту жоспарланған. Құқық бұзушының мінез-құлқына қойылатын ерекше талаптар аясында сотқа „агрессорды“ тұрғын үйден уақытша шығару құқығы беріледі. Сондай-ақ, сот „агрессордың“ денсаулық сақтау ұйымдарында міндетті психокоррекциялық курстан өтуін міндеттеуге құқылы», — деді ол орталық коммуникациялар қызметіндегі дөңгелек үстел барысында.
Оның атап өтуінше, осыған ұқсас мінез-құлыққа қойылатын ерекше талаптар Қылмыстық кодекстің аясында да белгіленеді.
«Сонымен қатар, ел Президенті ІІМ-де отбасылық-тұрмыстық зорлық-зомбылыққа қарсы күрес жөніндегі мамандандырылған бөлімше құруды тапсырды. Ол отбасын қолдау орталықтарымен, ҮЕҰ-мен және мүдделі мемлекеттік органдармен өзара іс-қимыл жасай отырып, тұрмыстық зорлық-зомбылық проблемаларын шешумен айналысады», — деді Ренат Зулхаиров.
