By Caspian News, 21 қараша. Армения премьер-министрі Никол Пашинянның Астанаға сапары екі ел арасындағы ынтымақтастықты жаңа деңгейге көтеруге бағытталмақ. Пашинян Қазақстанға келе сала әлеуметтік желіні «жағымды вайбқа» толтырды: Instagram парақшасында Астананың көріністері түсірілген қысқа бейнеролик жариялап, соңында қолымен жүрек белгісін көрсетті. Бейнежазбаға қазақ әншісі BAYANSULU-дың Aua rai композициясын пайдалану да жұрт назарын аударды.
Әлеуметтік желі қолданушылары «пашинянстайл» трендін қайталап, армян премьерінің желідегі белсенділігін қызу талқылап жатыр.
Ресми кездесу: стратегиялық серіктестікке жаңа серпін
Ақордада Пашинянға дәстүрлі қарсы алу рәсімі жасалды: көк кілем, Құрметті қарауыл ротасының оркестрі және екі ел делегацияларының салтанатты қарсы алуы.
Келіссөздер барысында Қазақстан Президенті Қасым-Жомарт Тоқаев Армения премьерінің алғашқы ресми сапары стратегиялық серіктестікті дамытуға тың серпін беретінін атап өтті.
Қасым-Жомарт Тоқаев:
«Бұл сапар екі елдің стратегиялық серіктестік деңгейіндегі қарым-қатынасына жаңа серпін беретініне сенемін. Қазақ халқы армян жұртына, мәдениетіне зор құрметпен қарайды».
Өз кезегінде Никол Пашинян екі ел қатынастарының жаңа кезеңі Тоқаевтың өткен жылғы Ереван сапарынан басталғанын айтты.
Никол Пашинян:
«Қарым-қатынасты стратегиялық серіктестіктен де жоғары деңгейге көтеруге мүмкіндік бар. Сауда-экономикалық, гуманитарлық байланыстарды нығайтып, бизнес серіктестікті қайта жандандыруымыз керек».
Тікелей әуе рейстері қайта ашылуы мүмкін
Кеңейтілген құрамдағы келіссөздерде сауда, көлік-логистика және гуманитарлық жобалар талқыланды. Екі ел арасында тікелей әуе рейстерін қайта қосу мәселесі де айтылды.
Ұлттық экономика министрі Серік Жұманғариннің айтуынша, қазіргі кедергі — Ереван әуежайындағы қызмет көрсету құнының өте жоғары болуы.
Серік Жұманғарин:
«Ереван әуежайында қызмет көрсету — бір адамға 65 доллар, бір тонна авиакеросин — 1 248 доллар. Тарифтерді субсидиялау жолдары қаралып жатыр. Бұл мәселе шешілсе, SCAT пен FlyArystan рейстерді қайта ашуға дайын».
Сауда айналымы 6 есе өсті
Соңғы жылдары Қазақстан мен Армения арасындағы сауда көлемі айтарлықтай артты:
-
2020 жылмен салыстырғанда 6 есе өсіп,
-
82 млн долларға жетті.
Қазақстан Арменияға экспорттауды жоспарлап отырған өнімдер:
-
темекі өнімдері
-
трансформаторлар
-
ферроқорытпалар
-
металл бұйымдары және прокат
Армения Қазақстанға жеткізеді:
-
жеміс-жидек, көкөніс
-
темекі өнімдері
-
әлемге танымал армян коньягы
Астанада жаңа көше ашылды
Пашинянның Қазақстанға сапары аясында Астанада армян әліпбиінің негізін қалаушы Әулие Месроп Маштоц атындағы көше ашылды.
