By Өнер емес, қызмет көрсетуде. Елімізге танымал тұлғалар халыққа қызмет көрсету орталықтарына келіп, жұмысқа кірісті. Бұл шара республика көлемінде әлдеқашан басталып кеткенімен, Атырауға енді жетті. Бұл жолы №3-ші халыққа қызмет көрсету орталығына келген «Бауыржан-шоу» театрының бұрынғы әртісі Нұрбек Мәдиев электрондық сандық жүйені пайдалана отырып, келушілерге қызмет етті. Әрі мұндағы қызметкерлердің бұл жүйені қаншалықты игергендіктерін де бақылады.
Бұл жұмыстардың барлығы – «Цифрлық Қазақстан» бағдарламасының өңірлерде қаншалықты жүзеге асып жатқандығын анықтау мақсатында жасалуда. Мақсат – тұрғындарды қағазбастылықтан құтқару. Айта кетейік, күніне мыңдаған адамға қызмет көрсететін Атыраудағы арнайы орталықтар да жаппай сандық жүйеге көшуді бастап кеткен болатын және оны толықтай 2020-шы жылға таман аяқтаймыз деп отыр.
