Атырау облысында кеше жоғалып кеткен үш адам тікұшақпен іздестіріліп жатыр.
Облыстық төтенше жағдайлар департаменті қоғаммен байланыс тобының мәліметінше, үш адам 9 қаңтарда сағат 11:00 шамасында «Toyota» маркалы автокөлігімен жолға шығып, хабар-ошарсыз кеткен.
«Үш адам Мақат ауданындағы Доссор кентінен Қызылқоға ауданының Қарабау ауылына қарай жолға шығып, түнге дейін оралмаған. Телефон байланысы жоқ. Бұл туралы бүгін, 10 қаңтарда сағат 00:00-де жоғалған адамдардың туыстары Атырау облыстық ТЖД аумақтық бөлімшесіне хабар берді»,— деп хабарлады департаменттің қоғаммен байланыс тобы.
Қазір Атырау облысының ТЖД күштері жоғалған 1984, 1986 және 1996 жылғы үш адамды іздестіріп жатыр. Бүгін 10 қаңтарда сағат 13:26-да іздестіру-құтқару жұмыстарына «ҚазАвиаҚұтқару» АҚ-ның МИ-8 тікұшағы тартылды. Тікұшақ бортында ТЖД-ның 4 қызметкері, жоғалғандардың туыстары мен экипаждың 5 мүшесі бар.
